يجلس الرجل أمام الفرن المشتعل، يُحضِر ما صنعته يداه، ينظر للتفاصيل الأخيرة التي نحتها، يضعها برفق داخل الفرن المشتعل، يحرص على متابعة تمثاله داخل الفرن، ناسيًا حرارة الصيف، يفكر في شيء واحد، كيف يُنجح موهبة عائلته ويورثها لأولاده؟
ـ نتعرف على حضرتك؟
حسن مبارك محمد 49 سنة.
ـ متى بدأت في حرفة الفخار؟
من وأنا صغير كنت بروح مع والدي في المحل وكان يعلمني أنا وأخوتي، والحمد لله طالعين كلنا بنحب المهنة.
ـ ايه هي المواد المستخدمة في صنع الفخار؟
هو الفخار من الطين الأسواني في الأساس لكن دلوقتي طلعت مواد جديدة بتتحط للشكل والزخرفة يعني مش أكتر بس أساسه الطينة الأسوانية.
ـ إزاي بتصنع الفخار؟ احكي لنا عن المراحل المختلفة ؟
هو بيكون عندي أشكال انا عاملها وبشتغل عليها تساعدني في عمل الفخارة أسرع، مفيش مراحل في الفخار يعني بس أهم حاجة إنك بعد ما تعمل الشكل لازم تسيبه ينشف وبعد كده تدخله فرن.
ـ إيه الصعوبات اللي بتواجه صانع الفخار في مصر؟
مفيش صعوبات واجهتني لغاية دلوقتي الحمد لله، مفيش مشاكل أو حاجة بتوقفنا.
ـ الفخار يحتاج لنار شديدة، ازاي بتصنعه في المكان هنا؟
هو في حاجات مينفعش تتصنع غير في أماكن معينة تكون النار شديدة فيها، ده بيكون مش هنا يعني وفي حاجات سهل حرقها، دي بنحرقها احنا هنا وأنا عملت فرن لحرق الفخار عندي هنا.
ـ إزاي بتواجه حر الصيف مع حر الفرن في نفس الوقت ؟
هو متعب جدا لكن الحمد لله اتعودت خلاص، يعني بقى شئ عادي بالنسبة لينا.
ـ هل كورونا أثرت عليكم في البيع والشراء ؟
طبعا يعني هو كورونا أثر مع الجميع وطبعا في فترة انتشار الفيروس الشديدة كان الحال واقف جدًا وكان في صعوبة في إن البضاعة تيجي أو إني أبعت بضاعة.
ـ بتنصح الولاد الصغيرين اللي بيحبوا الفخار والصلصال يعملوا إيه؟
ياريت يهتموا لأنه هو أصلا ممتع ويساعد الأطفال جدا في التفكير وفي إنك لازم تصنع شكل وبسرعة قبل ما الطينة تنشف، بيكون شيء ممتع جدا.
ـ أغلى فخار عملتها في يوم وبعتها كانت ايه؟
مفيش حاجة معينه يعني إحنا مش بنصنع حاجة واحدة، هو بيكون كميات ويتم بيعها.
ـ هل في حد من ولادك شاطر في المهنة زيك؟
هما كلهم طالعين بيحبوا يشاركوا معايا، أنا باخدهم معايا في الإجازات يساعدوني وبعلمهم.
ـ ولادك في سنة كام ؟
عند بنتي الكبيرة في 2 ثانوي، والثاني في 1 إعدادي، والثالث في 3 ابتدائي.
ـ هل الأنابيب أفضل؟ ولا الغاز الطبيعي أفضل من الأفران اللي بتسوي فيها الفخار؟
مش بشتغل بالغاز الطبيعي لأنه مينفعش معانا، بشتغل بالأنابيب أحسن.
ـ هل كل المواد المستخدمة في الفخار من الطينة الأسوانية ولا مواد من محافظات تانية؟
في مواد تانية بسيطة من محافظة الوادي الجديد.
ـ إيه حلمك اللي نفسك فيه من زمان، تنحت مثلا فخارة كبيرة، تمثال ؟
هو نفسي أعمل حاجة أو أنحت تمثال ويفضل أثره على مر الزمن.
ـ شايف إن الصين أثرت في الأشكال المستوردة ولا الفخار المصري أفضل ؟
هو أصلا مفيش فخار صيني، ده شغل ماكينات ميعتبرش فخار، لأن الفخار أساسه إنه يدوي، اللي بيجي ده شغل زخرفة مش أكتر لكن الشغل اليدوي المصري يكسب.
