"إحنا مش ضد التنظيم، ولا هدفنا تعطيل الشوارع، لكن منقدرش نسيب المكان بتاعنا ونروح سوق النخلة لأنه بعيد عننا وعن الزباين"، يقول السيد علي، أحد الباعة الجائلين بمدينة المنصورة.
وافترش مجموعة من البائعين الجائلين، صباح الأحد، الأرصفة بشارع الجلاء، ما سبب أزمة مرورية لاقتطاع جزء من الطريق.
من وسع الشارع إلى بُعد المسافة
في الثاني من أغسطس الجاري، شنت محافظة الدقهلية، حملة لإزالة الإشغالات بالشوارع الرئيسية من بينها شارع الجلاء، الذي يضم مديرية التربية والتعليم وعدد من المدارس، وأمهلت الباعة الجائلين يومين لرفع بضائعهم والذهاب بها إلى سوق بشارع النخلة.
ويستقطع بعض الباعة والمواطنين، الذين تحدثوا لـ"قلم المنصورة"، نصف الساعة، للوصول إلى سوق النخلة، ما يجعله بعيدًا إلى حد ما عن قلب المدينة.
ويقدم أيمن مجاهد، موظف وأحد السكان، حلًا لا يضر بالبائع ولا المارة: "إحنا مع رزق الناس، بس كمان عايزين الشارع يفضل مفتوح ونضيف، الحل في سوق منظم قريب، مش في أسواق بعيدة محدش يقدر يوصلها بسهولة زي سوق شارع النخلة، لكن كل الأسواق اللي في المدينة بعيدة عن المنطقة، وده بيضر المواطن قبل البائع".
الشارع أم التكلفة؟
ذهب السيد علي، لاختبار محال السوق الجديد، قبل أن يحمل بضاعته ويترك مكانه المعتاد بالشارع، إلا أنه فوجئ بارتفاع أسعار إيجار المحال التجارية بسوق النخلة، يقول: "ولما سألنا على إيجارات المحلات في المنطقة وصلت لـ10 آلاف جنيه، مفيش بياع يقدر يدفع الإيجار دا".
ويوضح: "إحنا عايزين نسترزق ونكفي بيوتنا ونعيش مستورين، لكن الحكومة بتطلب مننا نمشي من غير ما توفر لنا مكان، حتى صغير قريب من المنطقة أو محلات بإيجارات معقولة".
ويقول أحمد عبدالغني، 52 عامًا، بائع خضار منذ أكثر من عشرين عامًا بالمنطقة: "إحنا شغالين في السوق من زمان، بس الوضع دلوقتي بقى صعب، مفيش مكان ثابت نعرض فيه بضاعتنا، وبنضطر نقف في الشارع وسط الزحمة، وده بيعمل مشاكل مع الناس اللي ماشية وأصحاب المحلات".
ويتابع: "إحنا محتاجين سوق منظم ومساحة واسعة نقدر نعرض فيها شغلنا بشكل يليق، عشان الزبون يحس بالراحة ونحافظ على رزقنا، وكمان المواطنين مش عايزين سوق بعيد عنهم لازم يكون السوق في محيطهم".
خدمة الزبائن وإزالة الإشغالات
ويقول حسين إبراهيم، 60 عامًا، بائع أسماك: "أنا بشتغل في بيع السمك من وأنا شاب، وكل يوم بعاني من نفس المشكلة، مفيش مكان منظم نقف فيه، ونضطر نلف ونتنقل بين أماكن مختلفة، وده بيتعبنا وبيأثر على شغلنا، وكل يومين المحافظة تيجي تشلنا ونرجع تاني عشان مفيش مكان لينا".
كل ما يطلبه حسين هو مكان "نظيف ومنظم"، تتوفر فيه مرافق تساعده في العمل، مثل مصدر مياه وصرف صحي: "عشان نقدر نخدم الزباين بطريقة محترمة"، على حد قوله.
وكلف محافظ الدقهلية، اللواء طارق مرزوق، رئيس حي غرب المنصورة، محمد أمين، بزيادة حملات إزالة الإشغالات من شارع الجلاء، والتأكد من عدم عودة المخالفات مرة ثانية، حفاظًا على حركة المرور والانضباط في الشارع، مؤكدًا أن الجولات الميدانية للمحافظة مستمرة لمتابعة أداء الأجهزة التنفيذية على الأرض ومنع الإشغالات.
