أهالي المنصورة في رمضان.. بين العمل ومقابلة الأصدقاء والعبادة

الثلاثاء 20 يونيو 2017 10:19 ص
image
يقضي الأهالي شهر رمضان على طريقتهم الخاصة، فلكل منهم طقوسه التي أعتاد على تطبيقها ليستمتع بالشهر، وفي محاولة من فريق "قلم المنصورة"، للتعرف على تلك الطقوس، والأماكن التي يذهب إليها أهالي المنصورة في رمضان، تحدثنا إلى عدد من الأشخاص وكانت تلك أرائهم.. "بقضيه في الشغل".. يقول محمد عبد العزيز، 80 سنة، مالك أحد المحلات: "بقضي اليوم في الشغل، والصلاة في الجامع، وأحب لمة العيلة، وزيارة القرايب أحبها أكتر، ولك سنة بعمل نفس الشئ، لكن بسبب شغلي مبعرفش أخرج". ويقول أيمن إبراهيم، 56 سنة، تاجر: "أنا من البيت للجامع، ومن الجامع للشغل، وبالليل بروح أصلي صلاة الفجر، وكل سنة بعمل نفس الشئ لأنها عبادة، وفي الأجازة الأسبوعية، بحب أزور عيلتي وقرايبي". "أنا موظف حكومي بقضي كل يومي من بدايته لأخره في الشغل، مبروحش مصايف، وكل سنة بقضي رمضان في الشغل، وبحب أخرج يوم في الأسبوع مع العيلة".. هكذا يقضي أحمد سيد، 49 سنة، موظف، شهر رمضان كل عام. ويقول محمد رزق، 30 سنة، بائع فواكه: "لما كانت الأسعار قليلة، كنت بقضي رمضان مع لمة العيلة، وزيارة قرايبنا، لكن ارتفاع الأسعار وغلا العيشة، خلاني بقضي رمضان كل يوم في الشغل". "مع الصحاب".. أما محبو الإنطلاق، والجلوس على المقاهي مع الأصدقاء فكانت تلك أرائهم.. يقول وائل عبد العزيز، 40 سنة، تاجر: "بشتغل ساعتين قبل الفطار، وبعد كده بنزل أقعد ع القهوة مع أصحابي، لأني بحب أقضي رمضان مع أصحابي كل سنة، فنخرج ونقعد ع القهاوي". ويقول إبراهيم رمضان، 28 سنة، طاهي طعام: بحب أقضي رمضان في الخروج مع أسرتي، وأزور القرايب، ومبعملش دا كل سنة، لأن في سنين قضيت رمضان فيها في الشغل بشكل يومي، عشان لقمة العيش، لكن في العموم بحب أقضية مع العيلة". "الصلاة والعبادة".. يقول عصام رزق، 70 سنة، مستشار: "بقضي رمضان كل سنة في العبادة، ووقت الصيام بروح لصلاة العصر، ولما برجع بقرا قرآن، وما بشتغلش كل يوم يادوب مرة أو مرتين في السبوع بس، ويوم الجمعة بحب أزور عيلتي". يقول هيثم فتحي، 39 سنة، بائع: "بقضي رمضان في الاعتكاف في الجامع وأنا صايم، وفي الفطار مبفطرش في بيتي، بحب افطر في مائدة رحمن، وأفطر الصايمين، وبعد كده بقرا قرآن لغاية العشا، وبعدين اقعد مع أصحابي على القهاوي، وبحب أعمل ده كل سنة". وأخيرا يقول الطالب عبد الرحمن محمد، 17 سنة عن طقوسه في شهر رمضان: "بقضي رمضان في العبادة، وبشتغل الشهر في حفظ بعض أجزاء القرآن الكريم، وبصلي كل الفرود، وبفطر صايمين، لأنه شهر عبادة، ولو خرجت بحب أخرج مع أصحابي".