حاضرو إفطار "لم الشمل": "يوم رائع وسعداء بلمة الناس على ترابيزة واحدة"

الجمعة 16 يونيو 2017 12:25 م
image
أقام فريق "لم الشمل" أمس الخميس الموافق 15 يونيو، الإفطار السنوي، تحت شعار "لم الشمل" أيضًا، يتم تنظيم الإفطار للمرة الثالثة على التوالي هذا العام، والذي يستخدم عائده في أعمال الخير، وكان المخطط أن يُجمع من خلاله 500 ألف جنيه، وحرص فريق "قلم المنصورة" على رصد أراء الحاضرين والمشاركين في التنظيم في لسطور التالية.. تقول سلمى الجميلي، 23 سنة، مسؤولة فريق "لم الشمل": "المبلغ المطلوب كان 500 ألف جنيه، والتبرعات كانت على الوجبات، وفي ناس أتبرعت برة الوجبات، ولما جمعنا المبلغ الي تم التبرع به وحصرناه لاقينا أنه أكبر من الميلغ المطلوب، فهنقوم بإرسال المبلغ الزايد لمستشفى أورام المنصورة". ويقول عبد الله عباس، عضو فريق charity engine: "لما عملنا فريق الكورة دا، كنا مجموعة شباب وزنها زايد وعايزين يخسوا جدًا، ولما مستوانا أتحسن، بعتنا للمنتخب وجالنا شوية لاعيبة، ولعبوا معانا وكسبناهم، والمبلغ اللي دخلنا راح لمستشفى الأورام، عشان نفتح فيها عناية للأطفال، وبفضل (لم الشمل)، قدرنا نجمع المبلغ الباقي النهارده". "كان يوم أكتر من رائع خاصة إنه كان في يوم رمضاني جميل بأجوائه اللي ما بنشوفهاش غير من السنة للسنة، وسعيد جدًا بلمة الناس كلها مع بعضها على ترابيزة واحدة، حاجه كده تفتح النفس، وجو خيمة رمضان، والأنوار والأغاني اللي كانت مالية المكان".. هكذا يرى أحمد علي، 25 سنة، إفطار "لم الشمل". وأخيرًا يقول الأستاذ طارق عبد الهادي، رئيس مجلس إدارة النادي: "فخور جدًا بأولادي، وأولاد النادي، لأن هما الرؤساء اللي جايين، واللي هيخلوا النادي أفضل على مستوى الجمهورية".