أهالي عن موائد الرحمن: "بهجة الفقراء وبتحلى باللمة"

الثلاثاء 06 يونيو 2017 11:02 ص
image
تعد موائد الرحمن، في شهر رمضان، وسيلة لإفطار وإسعاد الصائمين، إلا أن تنظيمها داخل مدينة المنصورة يواجه بعض المشكلات مثل التراخيص، إضافة إلى مشكلة ارتفاع أسعار السلع الغذائية، التي دفعت بعض الأهالي الحريصين على تنظيم الموائد، للتوقف عن تنظيمها، واحتار بعضهم هل ينفقون الأموال على أسرهم، أم على تنظيم موائد الرحمن، وهو ما أثر على من يترددون على موائد الرحمن، وينتظرونها كل عام. لذا حرص فريق "قلم المنصورة"، على رصد أراء أهالي المنصورة حول تنظيم موائد الرحمن في ظل غلاء الأسعار، في السطور التالية.. يقول أيمن الدموهي، 50 سنة، مالك محل أحذية: "موائد الرحمن بتساعد الناس في تقديم وجبات الأكل، ووجود اللمة، وبتفرح الناس اللي على قدهم، وفي ناس بتستناها من السنة للسنة، عشان كده شايف أن لازم يبقى في موائد رحمن، حتى لو كانت السلع الغذائية غالية، وأنا بساعد في إفطار الناس بالتمر". يقول الطالب يوسف أشرف، 15 سنة: "موائد الرحمن بتساعد المحتاجين ياكلوا ويشربوا بدون خجل، ومن غير ما يدفعوا مقابل مادي، ده غير إن وسط ارتفاع الأسعار موائد الرحمن بقى فيها طبقات اجتماعية تانية بتاكل فيها، مش بس المحتاجين". أما فرج أبو المجد، 65 سنة، حارس عقار: "موائد الرحمن عمل خيري، لدرجة إن في مطاعم بتوقف شغلها في رمضان، وبتعمل موائد رحمن، ولازم يقللوا الأسعار، عشان نعرف نفطر الناس حتى لو بطاطس ورز بس". "موائد الرحمن بهجة الفقرا وغير القادرين على شرا الأكل في رمضان، وهي عمل خير ثوابه الكبير بيرجع على اللي بينظمها، وأنا بفطر الناس عصاير عند أذان المغرب".. هكذا يرى محمد الصعيدي، 26 سنة، بائع "خروب"، أهمية موائد الرحمن. يقول حسن صلاح الدين، 56 سنة، محاسب: "المفروض ميكونش في تراخيص على موائد الرحمن، لأنه عمل خيري والناس بتستناه من السنة للسنة، وإحنا بنعمل بعد رمضان، أعمال خيرية في ميت حيدر كل خميس، وبنوزع لحوم على غير القادرين". يقول إسلام العروبي، 28 سنة، موظف بالاستيراد والتصدير: "موائد الرحمن خير للكل، وأنا بجمع فلوس أنا وبعض الأهالي، عشان نعمل موائد رحمن كل سنة". يقول أحد المواطنين الذي اعتادوا التردد على موائد الرحمن، ومقيم في "ميت حدر" رافضًا ذكر اسمه: "لازم يكون في حل لمشكلة ارتفاع الأسعار، لأن ده بيعمل مشكلة للي بيعملوا الموائد، وفي ناس ما بتعرفش تروح موائد الرحمن عشان نظرة المجتمع لهم، بس للأسف أنا عارف إن اللي بيغلى ما بيرخصش ده حتى كيلو الحلويات بقى بـ75 جنيه، وكل يوم بيتغير سعرها". "الأكل في الموائد كويس، وكان بيتوفر فيه اللحمة".. هكذا يرى السيد محمد، 32 سنة، موظف، أهمية موائد الرحمن في المنصورة.