سؤال للإعلام المصري

الخميس 11 أغسطس 2016 04:32 م
image
ليه الإعلام المصري خصوصا الفترة الأخيرة، أو من قبل الثورة، بعيد عن الحقيقة، أو بيقول الحقيقة اللي هوّ عايزني أعرفها، بيأكلني بالملعقة ويقولي ده رأيك، دي المفروض الطريقة اللي أنت تفكر بيها. ليه برامج التوك شو دلوقتي أصبحت مدتها تتجاوز الأربع ساعات، حتى الضيوف بيتنقلوا من ستديو للتاني، وبيقولوا نفس الكلام اللي قالوه في البرنامج بتاع إمبارح، نفس الكلام بتاع المقال، نفس الكلام بتاع "البوستس" و"التويتّات" بتاعتهم، بحس إن مفيش جديد، والمفروض إني بتفرج على خبراء إستراتيجيّين، و محلّلين سياسيّين. معدّين برامج التوك شو من رأيي لازم ياخدوا دورات في كيفيّة إعداد البرامج، لإنهم ببساطة بيفتحوا السوشيال ميديا ويشوفوا كام خبر النهاردة على تويتر، الأهرام مثلا بتقول إيه.. كلم الضيوف.. حدّدلي المكالمات اللي هناخدها في الحلقة. طب ما اللي أنت هتتكلم فيه بليل في برنامجك أنا قرأته الصبح وعارف اللي هتقوله، فين الجديد؟ السوشيال ميديا في حد ذاتها إعلام، إعلام أنت اللي بتشكلّه، إعلام بتخليه يقول رأيك، بتحط عليه بصمتك. ناس كتير جدًا اتشهرت بسبب السوشيال ميديا لإنهم عبّروا عن رأيهم وعملوا الحاجة اللي تبسطهم زي باسم يوسف، أحمد أمين، عمرو راضي، شادي بتاع أبلة فاهيتا.