تربية الحمام في بورسعيد.. إدمان يورثه الآباء للأبناء

الأربعاء 01 فبراير 2017 04:00 م
image
الحمام من الطيور المنتشرة في كل من الريف والحضر، وكان قدماء المصريين يربون الحمام في أبراج من الطين والفخار والتي مازالت مستعملة حتى الآن في بعض القرى، ويتميز الحمام عن غيره من الأنواع الداجنة الأخرى بسهولة تربيته، ومقاومته لكثير من الأمراض والظروف الجوية المختلفة، كما أن تكلفة غذاء الحمام منخفضة. في بورسعيد الأمر منتشر جدا، ولا تجد منطقة سكنية لا يزين سطحها أبراج الحمام، التي تصل أحياناً إلى أكثر من ثلاثة أدوار، والتي تزين أغلبها بألوان أعلام بعض الدول، وشعار النادي البورسعيدي، وتعد أبراج الحمام أحد معالم مدينة بورسعيد، وهناك مقولة بورسعيدية تقول "البورسعيدي الأصيل تعرفه بتشجيعه للمصري البورسعيدي وتربية الحمام". يقول عبدالرحمن أحمد مربي حمام: "بابا كان بيربي الحمام، وأخويا الكبير أيضا، وأنا بدأت أربي الحمام منذ الصغر، أخويا الكبير راح يشتري حمام وكنت محوش ٢٥ جنيه، كان وقتها الفرد بـ١٢ جنيه، بدأت بجوز حمام ولما كتر عملت خمس أجواز". وأضاف عبدالرحمن: "في بورسعيد في ناس بتربي الحمام كهواية، عشان ياخدو حسنات، وناس تانية بتشتغل فيه بيشتروه من دمياط زغاليل بأسعار رخيصة، ويكبروه ويبيعوه وهكذا، الناس في بورسعيد بتبيع الفرد بأسعار خيالية، وفيه ناس جابت عربيات وفتحت بيوت من تجارة الحمام". يقول عبدالرحمن: "الحمام ينقسم لثلاثة أنواع أساسية، بلدي وبزرميط ولعب، اللعب زي (الشقلباظ) وفيه منه أحمر وأخضر وأبيض وكولى وهندى وفنتظلى وأمريكانى سواء أحمر أو أصفر أو أسود، وفيه عندك أسترالي وأسترالي برقبة وسويحلي ورمايا وحجرى وكليزر وكشكي وفى كتير غيرهم". وعن أماكن بيع الحمام في بورسعيد قال عبدالرحمن "أكثر الأماكن المشهورة ببيع الحمام، حي العرب عامة، وخصوصا شارع 100 كنت بشتري منه وأنا صغير، ولسه بشتري منه لحد دلوقتي، والسنة اللي فاتت اتعمل أول سوق جمعة جنب موقف دمياط القديم، وكل جمعة يجتمع الناس اللي غاوية تربية الحمام بيشتروا، وناس تانية واقفة تبيع، والأسعار بتبدأ في أسواق بورسعيد بـ٥٠ و٧٠ جنيه وتصل إلى ٣٠٠٠ جنيه وأكتر حسب النوع". يضيف عبدالرحمن: "أكل الحمام على حسب، فيه الحمام اللي مبيطرش بياكل زينا علشان يتعلف صبح وآخر النهار وبليل، أما اللى بيطير بياكل مرة واحدة آخر النهار، وكل واحد حسب مزاجه، أكل الحمام بيكون دره عويجي بـ٤ جنيه والخلطة الدرة بـ٤.٥ جنيه، أما أمراض الحمام والأمراض المنتشرة، برد والحالة والهزة، وعلاجها بيبقي متوفر في الصيدلية البيطرية".